Иахьа, 2026 ш. ԥхынгәымза 9 рзы В.Г. Арӡынба ихьӡ зху Жәларбжьаратәи аҳаирбаӷәаза «Аҟәа» иаднакылеит Оренбургынтәи иааиԥмырҟьаӡакәа имҩаԥысуа раԥхьатәи ареис. Иу.А. Гагарин ихьӡ зху Оренбург жәларбжьаратәи аҳаирбаӷәазаҟынтә иааз авиаеилахәыра «РусЛаин» аҳаиртә ӷба авиациатә традициа инақәыршәаны иаԥылеит — адгыларҭаҿы аныҳәатә ҵакы змоу аӡтәы хыргьагьа.
Оренбургҟа иааиԥмырҟьаӡакәа ареисқәа рдәықәҵара аҟәатәи авиабаӷәаза аԥырратә программа агеографиа арҭбаауеит, апассаџьырцәа рзы Аладатәи Урал ақалақь хадақәа руак азы иманшәаланы имҩаԥысуа ишиашоу авиаеимадара аанартуеит.
«Оренбургынтәи раԥхьатәи ареис ааира 2026 шықәсазтәи аԥхынтәи аԥырратә программа акрызҵазкуа даҽа хҭыскны иацлеит. Оренбургтәи аобласт — Урыстәыла ааглыхратәи акультуратәи регион дууп, шьҭа уи ауааԥсыра акыр ирзыманшәалахеит ишиашоу Аԥснынӡа аара. Ари аԥхынтәи аамҭахәҭазы аҳаирбаӷәаза амаршруттә каҭа ҵыԥхтәи ашықәс иаҿырԥшны акыр аҽарҭбааит, Урыстәыла ақалақь дуқәа рахь иааиԥмырҟьаӡакәа имҩаԥысуа ареисқәа рахь иаҵанакуеит Екатеринбург, Казан, Уфа, Аминералтә Ӡқәа, Перм, Нижни Новгород, Ханты-Мансииск», — ҳәа азгәеиҭеит В. Г. Арӡынба ихьӡ зху Жәларбжьаратәи аҳаирбаӷәаза «Аҟәа» адиректор хада Руслан Блиндиук.
Аԥырратә программа аԥхынтәи ааамҭа зегьы иалагӡаны имҩаԥыслоит – цәыббрамза 3 рҟынӡа. Ареисқәа мчыбжьык ахь знык имҩаԥгахоит 50 ҭыԥ змоу аҳаирпланқәа Bombardier CRJ100/200 рыла. Аҟәантәи –- хашала, аԥырра 19:10 рзы, Оренбург инеиуеит 00:05 рзы (аԥшьаша). Оренбургнтәи –ԥшьашала, иԥыруеит 11:50 рзы, Аҟәа иааиуеит 12: 35 рзы. Амҩа иқәоит 2 сааҭки 55 минуҭи.
