Аҟәатәи аҳаирбаӷәаза ашҟа аԥырра аҭоурых аҟны актәи адаҟьа аанартит авиаеилахәыра ҬАМ АЕРО имҩаԥнагаз ареис Москвантәи. Ареис аҟны раԥхьатәи пассаџьырцәаны иҟан урыстәылатәи иреиҳау аҵараиурҭақәа рыҟны аҵара зҵо аԥснытәи астудентцәа, иара убас аҵыхәтәантәи ҩышықәса раахыс Жәларбжьаратәи аҳаирбаӷәаза "Аҟәа" аиҭашьақәыргыларазы аиҿкаааратә штаб ахантәаҩыс иҟаз, Ареспубликаҟны иналукааша аполитикатә усзуҩы Гәынба Бадра.
Авиациатә традициала аҳаирбаӷәаза аперрон аҟны актәи ареис иаԥылеит аҳаирбаӷәазатә амцарцәагатә автомашьынақәа рыла еиҿкааз аӡы хыргьагьа ҟаҵаны.
Аперрон аҿы иааз ирԥылеит авиабаӷәазеи Аԥсны аиҳабыра ахаҭарнакцәеи, асасцәа идырбан апассаџьырцәа рҭаҩырҭа азал, аԥырраԥхьатәи агәаҭарҭа аҟәша, аҳазалхырҭатәи аҳәаахьчаратә контроли рзалқәа.
«Аиашазы, иахьа даара аҵак ду змоу ахҭыс ҟалеит. 30 шықәса рышьҭахь Аҟәатәи аҳаирбаӷәаза иаднакылеит акыраамҭа ҳаззыԥшыз аҳаирплан. Агәра ганы сыҟоуп Урыстәылаҟа аԥырразы агеографиа есааира аҽшарҭбаало», – иҳәеит Гәынба Бадра.
Атуристтә аамҭа ианалага инаркны иааиԥмырҟьаӡакәа Урыстәыла ақалақьқәа рышҟа ареисқәа азԥхьагәаҭоуп.
