2025 шықәса жәабранмза 11 рзы Жәларбжьаратәи аҳаирбаӷәаза "Аҟәа" аҳаирпланқәа уахынла ианылашьцоуи ҽынла аметеорологиатә ҭагылазаашьақәа аныуадаҩуи шәарҭарада атәарахьы рнеира алзыршо алашарбагатә маҭәахәы аԥышәара мҩаԥнагеит.
«Аҳаирбаӷәазаҟны ишьақәыргылоу алашарбагатә маҭәахәы жәларбжьаратәи астандартқәа зегьи ICAO актәи акатегориа аҭаххарақәеи ирықәшәоит. Ари алашарбагатә маҭәахәы аусура ианалага, уи иалнаршоит аҳаирбаӷәаза "Аҟәа" уахынлеиԥш, ҽынла, аметеорологиатә ҭагылазаашьақәа аныуадаҩугьы, аҳаирпланқәа рыдкылара», – иҳәеит аҳаиртә ныҟәара аиҿкааразы адиректор хада ихаҭыԥуаҩ Валери Чаплыгин.
Жәларбжьаратәи аҳаирбаӷәаза "Аҟәа" аиҭашьақәыргылара аус хацыркын 2023 шықәсазы. Анардадкылаҩыс иҟоуп урыстәылатәи холдинг «Аинфраеилазааратә ҿиара». Жәабранмза 7 рзы аҳаирбаӷәаза Москвантә раԥхьатәи ареис аднакылеит. Аҳаирплан 20-ҩык апассаџьырцәа реиԥш, иара убас дҭатәан аҵыхәтәантәи ҩышықәса раахыс Жәларбжьаратәи аҳаирбаӷәаза Аҟәа аиҭашьақәыргыларазы аиҿкаааратә штаб ахантәаҩыс иҟаз, иналукааша аполитикатә усзуҩы Гәынба Бадра. Уи иазгәеиҭеит аҳаиртә баӷәаза аартра ҳазҭоу ашықәс аԥхынтәи атуристтә аамҭазы ишазԥхьагәаҭоу.
