Урыстәылатәи Афедерациа Ахада иадминистрациа анапхгаҩы актәи ихаҭыԥуаҩ Сергеи Кириенко Жәларбжьаратәи аҳаирбаӷәаза "Аҟәа" даҭааит. Ара аиҭашьақәыргылара шымҩаԥысуа, авиабаӷәаза арҿиара аплан дахәаԥшны ибеит. Иара убас аҳаирбаӷәаза ахаҭарнакцәеи Аԥсны Аиҳабыреи рԥылараан аҩтәылак рыбжьара иааиԥмырҟьаӡакәа авиаеимадара аиҭахацыркра аус далацәажәеит. Ихадароу зҵаараны иҟан ҳазҭоу ашықәс аԥхын атуристтә аамҭа инақәыршәаны еиԥмырҟьаӡакәа авиаеимадара ашьақәыргылара.
Аҳаирбаӷәаза "Аҟәа" аиҭашьақәыргылара Аԥсни Урыстәылеи еилахәны иаԥырҵаз акрызҵазкуа аинфраструктуратә проектқәа ируакуп. Ари апроект Ареспублика аекономикатә ҭагылазаашьа аиӷьтәреи аусурҭатә ҭыԥқәа раԥҵареи ирыцхраауеит.
Кириенко аҳаирбаӷәазаҟны ишиарҳәаз ала, уи аиҭашьақәыргылараҿы ҩ-аамҭахҵәахак азгәаҭоуп. Актәи аамҭа аҩныҵҟала имҩаԥысуеит ашьҭыԥраара-ртәарҭатә цәаҳәаҟны арҽеиратә усурақәа, аперронқәа реиҭашьақәыргылара, атерминалтә инфраструктура аԥҵара. "Ари аҳаирбаӷәаза шықәсык миллионк рҟынӡа апассаџьырцәа рымаҵ аура ҳалнаршоит", – иҳәеит аҳаирбаӷәаза ахаҭарнак. Уи иацҵаны иҳәеит арҭ аҩаамҭак рыҩныҵҟа имҩаԥысраны иҟоу аусурақәа рынагӡаразы аинвестициақәа рымҽхак ишартәо 30 млрд мааҭ. Убри аан аҳаирпланқәа рыдкылара иазхиахоит ҳәа иазԥхьагәаҭоуп лаҵарамза 1 инаркны.
