Асахьаҭыхыҩцәа қәыԥшцәа ирыдгалан Аԥсны авиациа атемеи, Ареспубликазы аҳаирбаӷәазеи Урыстәылеи Аԥсни рыжәларқәа реиҩызареи рҵакы аарԥшра.
Аицлабра иалахәын Аԥсны Аҳәынҭқарра зегьы аҟынтә 190-ҩык рҟынӡа абаҩхатәра змоу аҿар. Ахәыҷқәа русумҭақәа аарԥшын х – номинациак рыла: «Аԥсны Ажәҩан», «Аиҩызара ацҳа Урыстәыла-Аԥсны», «Владислав Арӡынба иҳаирбаӷәаза». Аицлабра иалахәыз аусумҭақәа ажиури аршанхеит еиуеиԥшым атехникақәеи арҿиаратә знеишьақәеи рыла: ашәыгақәеи акарандашьқәеи рыла иаԥҵаз асахьақәа инадыркны аҳаирплан амакет дуқәа рҟынӡа, иара убас апластилин иалху анапкымҭақәа.
Аицлабра аихшьалақәа рыла аиааира згаз алкаан ақәратә категориақәа зегьы рҿы. Зноминациақәеи зықәратә гәыԥқәеи рҿы актәи аҭыԥқәа аанызкылаз алахәцәа зегьы дасу ирықәнагаз аҳамҭақәа ранашьан. Аԥхьахә ҷыдақәа роуит еиҳа иоригиналтәыз аусумҭақәа равторцәа.
Аконкурс аԥҵаҩы – Жәларбжьаратәи аҳаирбаӷәаза «Аҟәа» аҟынтә аԥхьахә хада ланашьахеит Еиупова Вероника. Уи уажәшьҭа «Ҳаҭыр зқәу аҳаирбаӷәаза аҩыза қәыԥш» ҳәа ахьӡ лыхҵоуп, авиабаӷәаза даҭаар лылшоит, лҭаацәеи лареи хаҭалатәи аекскурсиагьы рзымҩаԥгахоит.
"Ахәыҷтәы ҟазара иазкыз аицлабра аартра иаҳзаҩызахеит. Ҳара иаабеит ҳхәыҷқәа аҳаирбаӷәаза аиҭашьақәыргылара шрыдыркыло, аҳаирпланқәеи аҳаирбаӷәаза ҿыци шаҟа бзиабарала, гәадурала иаадырԥшыз. Арҭ 190 усумҭа баша сахьақәам, напкымҭақәоуп, абиԥара ҿыц Аԥсны аԥеиԥш ишахәаԥшуа атәы рныԥшуеит. Ҳара ҳзы гәахәароуп абаҩхатәра қәыԥшқәа рыдгылара ахьҳалшаз, агәра гангьы ҳаҟоуп: дара роуп Ареспублика аԥеиԥш бзиа ачаԥара знапы ианугьы. Аҳаирбаӷәаза аицлабра иалахәу зегьы рзы иаартуп – ҳара гәахәарыла ахәыҷқәа аекскурсиақәа рҿы иҳадаҳкылоит ҳаамҭазтәи авиабаӷәаза аус шауа дҳарбарц азы», - ҳәа азгәеиҭеит В.Г. Арӡынба ихьӡ зху Жәларбжьаратәи аҳаирбаӷәаза «Аҟәа» адиректор хада Руслан Блиндиук.
Аицлабра иалахәыз аҵараиуратә усҳәарҭақәа рыҟнытә аҵаҩцәа зегьы В.Г. Арӡынба ихьӡ зху Жәларбжьаратәи аҳаирбаӷәаза «Аҟәа» ахь аекскурсиақәа рыҽрыладырхәразы асертификатқәа роуеит. Абасала, алахәцәа хаҭала аҳаирбаӷәаза аҭаара, уи аинфраструктура, ҳаамҭазтәи авиабаӷәаза аусура аҩныҵҟала ирбартә еиԥш аҭагылазаашьа рзаԥҵахоит.
Аицлабра аиҿкааҩцәа уи иалахәыз зегьы иҭабуп ҳәа рарҳәоит иаадырԥшыз арҿиаратә знеишьеи, агәаартреи, абаҩхатәреи рзы. Иарбанусзаалак Аԥсны авиациа аҭоурых аҿы адаҟьа ҿыц аартра иазкыз аныҳәа ду иахәҭакны иҟалеит.
Аицлабра мҩаԥысит Аԥсны иҟоу Урыстәылатәи Афедерациа Ацҳаражәҳәарҭа, Аԥсны аҵара аминистрра, Аԥсны акультура аминистрра, Гәылрыԥшь араион Ахадара иҟарҵаз адгыларала.
