Иахьа, 2026 шықәса лаҵарамза 7 рзы, В.Г. Арӡынба ихьӡ зху Жәларбжьаратәи аҳаирбаӷәаза «Аҟәа» имҩаԥысит Башкортосҭан аҳҭнықалақь аҟынтә аныҳәатә ҟазшьа змаз раԥхьатәи ареис аԥылара. Авиаеилахәыра «РусЛаин» аҳаирплан авиациатә традициала ишаԥу еиԥш, ахырхарҭа ҿыц аартра иасимволу, аӡтәы хыргьагьа ала бзиала шәаабеит ҳәа ахырҳәааит.
Уфантәи раԥхьатәи ареис иаԥылеит Аԥсны Аҳәынҭқарра аԥыза-министр Ихаҭыԥуаҩ Џьансыхә Нанба, Аԥсны Аҳәынҭқарра Аекономика аминистр Ҭемраз Амқәаб, аҳаирбаӷәаза адиректор хада Руслан Блиндиук, амассатә информациа ахархәагақәа рхаҭарнакцәа, авиабаӷәаза аусзуҩцәа.
«Уфантәи ареис ахацыркра аргара ҳҳаирбаӷәаза аԥхынтәи апрограмма хазырҭәаауа акрызҵазкуа хҭысуп. Ҳара иаабоит Башкортосҭани ааигәа-сигәа иҟоу арегионқәеи руааԥсыра рганахьала Аԥсны иарҭо азҿлымҳара. Аҳаирбаӷәаза акоманда ирылшо зегь ҟанаҵоит Ареспублика иаҭаауа асасцәа зегьы аԥсуа дгьыл аҿы рыҟазаара раԥхьатәи аминуҭқәа инадыркны агәахәара рнаҭарц, ишрыхӡыӡаауа рбарц азы», - ҳәа азгәеиҭеит Жәларбжьаратәи аҳаирбаӷәаза «Аҟәа», - адиректор хада Руслан Блиндиук.
Ишәгәалаҳаршәоит, Уфа — Аҟәа — Уфа амаршрут ала ареисқәа рынагӡара мҩаԥысуеит 2026 шықәса лаҵарамза 6 инаркны жьҭаарамза 15 рҟынӡа мчыбжьык ахь знык, иманшәалоу 50 ҭыԥ змоу аҳаирпланқәа Bombardier CRJ100/200 рыла. Аԥырра аамҭанҵыра иартәоит 3 сааҭки 20 минуҭи. Хашала Аҟәантәи аԥырра ҟалоит асааҭ 15:25 рзы, Уфаҟа анеира асааҭ 20:45 рзы, шьҭахьҟа аԥырра ҟалоит ԥшьашала асааҭ 09:20 рзы, Аԥсны аҳҭнықалақь аҟны ааира аамҭа асааҭ 10: 45 рзы акәхоит. Ҳаирбаӷәазацыԥхьаӡа иарбоу аҭыԥантәи аамҭоуп.
