Иаартуп В.Г. Арӡынба ихьӡ зху Жәларбжьаратәи аҳаирбаӷәаза «Аҟәа» аҟнытә Москвеи Нижни Новгороди ирыбжьало ареисқәа рзы авибалилеҭқәа рыҭира.
Жәларбжьаратәи аҳаирбаӷәаза «Аҟәа» аҟнытә актәи ареис азԥхьагәаҭоуп ҳазҭоу ашықәс лаҵарамза 1 азы москватәи аҳаирбаӷәаза Внуково ашҟа. Иааиԥмырҟьаӡакәа Аԥсны аҳҭнықалақьи Урыстәылеи рыбжьара ҳаирпланла аԥыррақәа мҩаԥнагалоит авиаеилахәыра «ИуВТ Аеро» сабшала аҳаирплан CRJ-200 ала. Аҟәантә идәықәлоит 19:20 сааҭ рзы, лаҵарамза 31 инаркны 20:20 сааҭ рзы. Москвантә ареисқәа дәықәлалоит 14:30 сааҭ рзы, лаҵарамза 31 инаркны 15:30 сааҭ рзы.
Авиаеилахәыра Икари Nordwind Airlinesи ихацдыркуеит ишиашоу авиеимадара Аҟәа – Нижни Новгород амаршрут ала. Ари ахырхарҭала ареисқәа мҩаԥгахоит лаҵарамза 6-еи 13-еи рзы, анаҩс ишиашоу аԥыррақәа рыпрограмма иацҵахоит лаҵарамза 30 инаркны хәашала. Аҟәантә идәықәлоит лаҵарамза 6-еи 13-еи асааҭ 22:40 рзы, Нижни Новгороднтә Аԥсны аҳҭнықалақь ашҟа асааҭ 17:50 рзы. Аԥыррақәа мҩаԥыслоит аԥырразы иманшәалоу 110 пассаџьартә ҭыԥ змоу Ембраер 190 аҳаирпланқәа рыла.
Аԥсны Аҳәынҭқарраҟнытә иааиԥмырҟьаӡакәа аҳаиртә еимадара еиҭахацыркхоит 30 шықәса инареиҳаны еиԥҟьаны аҟазаара ашьҭахь.