Аҟәатәи аҳаирбаӷәаза Асовет Еидгылаҟны иреиӷьу аҳаирбаӷәазақәа ируакын. Ақәрагьы маҷӡам. Иара аргылара иалагеит иҳаҩсыз ашәышықәса 60-тәи ашықәсқәа рыгәҭаны. Убасҟан ауп ианыргылазгьы аҳаирвокзал ахыбра хадагьы. Еиҳа ихьшәаны еиҭашьақәыргылан ашьҭыԥраара-ртәарҭатә цәаҳәа. Уи адренажтә системеи ахҟьеи аа-метрк аҵаулара рыман, аура 3,5 километр инеиҳаны, аҭбаара – 52 метр. Абри аҳаирбаӷәаза акыр еиԥшны иргылан усҟан аҳаирбаӷәаза Симферополь ақалақь аҟынгьы. Аҟәатәии Симферопольтәии ацәаҳәақәа акосмостә ӷба «Буран» амашәыртә ртәарақәа ирызкын. Аха Аҟәатәи аҳаирбаӷәаза еиҳа аԥыжәара амоуп: ара амра аныԥхо амшқәа еиҳа ирацәоуп, анаҟә ҟалаӡом, насгьы ҩ-ганк рыла артәарақәа рымҩаԥгара алшоит, избан акәзар Алашарбага ашыцәеи иареи еицыланы Аҟәатәи ашыцәа шьақәзыргыло Бабышьра ашыцәаҟны ишьҭоуп.
Аԥсны Аџьынџьтәылатә еибашьра ашьҭахь аҳаирбаӷәаза аусура аанкылан. Анаҩс Қырҭтәыла «ацхыраарала» Аԥсны аҳаирбаӷәаза жәларбжьаратәи астатус ацәыӡит, иара акодгьы аԥыхын.
Аибашьра ашьҭахьтәи ашықәсқәа зегьы аҳаирбаӷәаза Аԥсны Аҳәынҭқарра Атәылахьчара аминистрра аҳаиртә ӷбақәа тәарҭас ирыман.
Ҳаамҭазтәи аҭоурых:
2019 шықәса ԥхынгәымза 26 рзы Аԥсны Аҳәынҭқарра Аминистрцәа реилазаара аӡыӡба ала, В. Г. Арӡынба ихьӡ зху Жәларбжьаратәи аҳаирбаӷәаза «Аҟәа», иара убас Аԥсны Аҳәынҭқарра аҳаиртә еиужьра иаҭоуп ԥшь-нбанк рыла ишьақәгылоу жәларбжьаратәи акод URAS, анаҩс Урыстәылатәи Афедерациа Аҳаирнавигациатә информациа аизга (АР) иалаҵаны. Абри адокумент алагьы атәылауаҩратәи аҳәынҭқарратәи авиациа реицгыларҭа аҳаирбаӷәаза астатус ахҵан.
2023 шықәса рашәарамза 16 рзы Петербургтәи Жәларбжьаратәи аекономикатә форум аҟны Аҧсни Урыстәылеи рыбжьара иаҵаҩын В. Г. Арӡынба ихьӡ зху Жәларбжьаратәи аҳаирбаӷәаза «Аҟәа» аиҭашьақәыргыларазы аиқәшаҳаҭра.
Адокумент атекст азырхиан Урыстәыла Аекономикатә ҿиара аминистрра аспециалистцәа рыла, Урыстәыла Ахада Владимир Путин Урыстәылеи Аԥсни рыбжьара ишиашоу авиаеимадара ашьақәыргыларазы иусԥҟа анагӡара аҳәаақәа ирҭагӡаны.
Аиқәшаҳаҭра инақәыршәаны, урыстәылатәи аган ахы иаднаҵоит аинвестициатә проект аԥҟарақәа зегьы рынагӡара, аԥсуа ган анагӡаҩы аинвестпроектқәа рҳәаақәа ирҭагӡаны иаԥҵоу аобиектқәа ахатәтәра азинқәа рыхьчаразы, ашәахтәтә ԥҟарақәеи ашәахтәтә зин ҷыдақәеи, аҳәынҭқарратә хәдықәҵарақәа зегьи шинаҭо, иара убас аԥыжәаратә ԥҟара ақәныҟәарала адгьылтә ҭыԥқәа иҭара ахы ишаднаҵо азы.
Урыстәылеи Аԥсни ишиашоу авиаеимадара аиҭашьақәыргылара ҩ-тәылак реиҳабырақәа арегионқәеи абизнеси алархәны иаздырхио атуризм арҿиаразы астратегиа ду иахәҭакны иҟоуп.
Аиқәшаҳаҭра аԥҟарақәа инарықәыршәаны, аеродроми аеродромтә еилазаареи аҳәынҭқарратә хатәтәра аобиектқәа рыстатус аҽаԥсахӡом, аха аинвестор ихархәараҟәны иҟоуп. Аҳаирбаӷәаза ҩ-хықәкык змоу аобиект астатус шамоу иаанхоит, Аԥсны Аҳәынҭқарра Атәылахьчара аминистрра иаҵанакуа аҳаиртә ӷбақәа ргыларҭаны иҟазаауеит ԥасеиԥш. Аҳаирбаӷәаза, апассаџьырцәеи аидарақәеи рымаҵ аура (аиҭашьақәыргылара, аобиект ҿыцқәа рыргылара) иадҳәалоу аҳаирбаӷәазатә инфраструктуразы ахатәтәҩы изинқәа змоу аинвестор иакәхоит.