Иахьа аҳаирбаӷәаза Аҟәа иааит актәи апассаџьыртә реис. Уи мҩаԥнагеит авиаеилахәыра «ЮВТ АЭРО» москватәи аҳаирбаӷәаза Внуково аҟнытә. Абри ареис ала Аԥсны Аҳәынҭқарра еиҭашьақәнаргылеит 30 шықәса раахыс еиԥҟьаны иҟаз авиациатә еимадара. Актәи ареис апассаџьырцәа ирԥылеит Аԥсны Аҳәынҭқарра Ахада Гәынба Бандреи Урыстәылатәи Афедерациа Ахада Иадминистрациа анапхгаҩы актәи ихаҭыԥуаҩ Сергеи Кириенкои.
Аофициалтә хаҿқәа апассаџьыртә терминал аартра иазкыз аныҳәатә усмҩаԥгатә иалахәын. Иаазгьы, иԥырны ицаз раԥхьатәи ареисгьы ҭәын, ари иаҳәоит Аԥсныҟа ишиашоу иаауа ареисқәа азҿлымҳара ду шрымоу атәы. Арҭ ареисқәа рыла иааз апассаџьырцәа агәаларашәагатә ҳамҭақәа рыҭан, авокзал иаԥну ашҭаҟны еиҿкаан амилаҭтә ҟазшьа змаз аныҳәатә программа Аԥсны амилаҭтә чыс ацҵаны. Авиеимадара аиҭашьақәыргылара алыршахеит Аԥсны Аҳәынҭқарреи Урыстәылеи ирыбжьоу аиҳабырабжьаратә еиқәшаҳаҭра анагӡара иалҵшәны.
«Аҭоурыхтә ҵакы змоу ари ахҭыс ҳҳәынҭқарра аҿиаразы ҷыдала лагаламҭа бзиахоит», — иҳәеит Аԥсны Ахада Аҟәатәи аҳаирбаӷәаза аартра иамоу аҵакы азгәаҭаны.
«Аҳаирбаӷәаза аусура иалагоит. Урыстәылатәи Афедерациа Ахада Владимир Путин инапынҵала ҩ-тәылак реиҳабыра авиаеимадара азҵаарақәа рыла арегионалтә усеицура хацдыркит. Аҩадатәи арегионқәа жәпакы руааԥсыра, абиуџьеттә еиҿкаарақәеи аилахәыра дуқәеи русуҩцәа аԥхын Аԥсныҟа раашьҭра азҵаара зҿлымҳара арҭоит», - иҳәеит Сергеи Кириенко. Еиԥҟьарада авиациатә еимадара ахацыркра зыбзоурахаз акәны иҟалеит Аҟәа аҳаирбаӷәазеи аҳаирвокзалтә инфраструктуреи реиҭашьақәыргылара иазкны имҩаԥгаз зымҽхак ҭбааз аусура. Аиҭашьақәыргыларатә усурақәа ирылҵшәаны аҳаирбаӷәаза иалшоит ҳаамҭазтәи абжьаратәи, ахара магистралтәи ҳаирпланқәа рыхкқәа Суперџет-100, ТУ-214, МС-21, Аirbus А320, А330, Boeing 737 реиԥш иҟоу рыдкылара. Аҳаирбагәазаҟны ишьақәыргылоуп ҳаамҭазтәи алашарардыргатә маҭәахәы ИКАО 1 акатегориа змоу, ивтоматырку аметеорологиатә шәагатә система, ахархәарахь иалагалоуп аԥыррақәеи аимадареи рзы арадиотехникатә еиқәыршәара аҳаирпланқәа атәарахьы рҭалара алзыршо адгьылахыхьтә хархәагақәа.
Апассаџьырцәа рымаҵ аура хацыркуп аамҭалатәи атерминал аҟны. Ҳазҭагылоу аамҭазы аҳаирвокзалтә комплекс ҿыц аргылара мҩаԥысуеит аҳаирбаӷәаза аҩадахьтәи ахәҭаҟны. Аҳаирбаӷәаза аинфраструктура арҿиара иацҵахоит.
Москваҟа иааиԥмырҟьаӡакәа аԥыррақәа мҩаԥысуеит 50 ҭыԥ змоу аҳаирплан Bombardier CRJ200 ала. Анаҩстәи аԥырра мҩаԥысраны иҟоуп лаҵарамза 3 инаркны. Лаҵарамза 6 инаркны ихацыркхоит Нижни Новгородҟа аԥырратә программа инақәыршәаны авиаеилахәыра Икар Embraer 190 аҳаирпланқәа рыла. Рашәармаза инаркны аԥыррақәа ирылагоит широфиузелиажтә ҳаирпланқәа рыла, аҳаирбаӷәаза амаршруттә хырхарҭақәагьы рыҽдырҭбаауеит.
